Nowruz geldi güle besläp dünýäni
Ýakynda Maýa Kulyýewa adyndaky Türkmen milli konserwatoriýasy bilen Aşgabat şäher medeniýet müdirliginiň Merkezleşdirilen kitaphanalar ulgamynyň Nury Baýramow adyndaky şahamçasy bilelikde Halkara Nowruz baýramçylygyna bagyşlap “Nowruz geldi güle besläp dünýäni” ady bilen aýdym-sazly çäre geçirildi. Bu baýramçylyk çäresi esasan hem talyp ýaşlarda uly gyzyklanma döretdi. Geçen bu baýramçylyk çäresini Maýa Kulyýewa adyndaky Türkmen milli konserwatoriýasynyň kitaphana müdiri Maral Nuryýewa alyp bardy. Halkara derejede ähmiýetli bolan bu baýram dünýäde medeni-ynsanperwer ýörelgeleri kämilleşdirmäge, halklaryň arasynda dost-doganlyk gatnaşyklaryny pugtalandyrmaga ýardam berýär. Däp bolşy ýaly türkmen halkymyzda Nowruz saçagynda dürli we tagamly nygmatlar, köpdürli naharlar bilen bezemek dessury gadymdan bäri dowam edýär. Bu baýramçylykda esasan hem semeni, palaw, süýtli aş, dänik, bulamak, noýbaly unaş, mäşewe, Nowruz ýarmasy ýaly tagmlary goýýarlar.
Geçen gyzykly çärede Halkara Nowruz baýramynyň ýurdumyzda we Orta Aziýa ýurtlarynda bellenilişi hakynda kitaphanaçylar Ogulşeker Gurbanowa we Ogulşat Myradowa dagylary gyzykly gürrüňleri berdiler. Maýa Kulyýewa adyndaky Türkmen milli konserwatoriýasynyň kitaphana müdiri Maral Nuryýewa bolsa Nowruz baýramynyň taryhy hakynda gürrüň berdi. Dabaranyň dowamynda Türkmen çeper edebiýatynda Nowruz baýramynyň waspy hakynda Türkmen milli konserwatoriýasynyň talyplary bolan “Sazşynaslyk” hünäriniň 3-nji ýyl talyby Ýegenowa Ogulbeg bahar pasly hakyndaky şygyrlar bilen , “Saz mugallymçylygy” hünäriniň 1-nji ýyl talyby Taganowa Altyn hem watan hakynda, ýaz pasly hakynda öz döreden şygyrlary bilen çykyş etdi. Dabaraly çäräniň dowamynda “Bagşy” hünäriniñ 2-nji ýyl talyby Sahydursyn Mätiýewa ýerine ýetirmekliginde Nowruz baýramy, bahar pasly hakyndaky aýdymlary bilen, şeýle-de oňa sazandarlyk eden “Türkmen sazy” hünäriniñ 2-nji ýyl talyby Mergen Asdanow we şol kafedranyň 3-nji ýyl talyby Gurbangeldi Saparow dagynyň çykyşlary oňa gatnaşyjylara ruhy lezzet paýlady. Bu Gyzykly çäräniň dowamynda talyplar we myhmanlar Halkara Nowruz baýramy mynasybetli Maýa Kulyýewa adyndaky Türkmen milli konserwatoriýasynyň kitaphanasynyň gurnan kitap sergisini aýlandylar.
Çäräniň ahyrynda oňa gatnaşyjylar ýurdumyzyň gülläp ösmegi ugrunda uly aladalar edýän Gahryman Arkadagymyza, Arkadagly Gahryman Serdarymyza özleriniň çäksiz hoşallyklaryny aýtdylar.
Ogulbeg ÝEGENOWA,
Maýa Kulyýewa adyndaky
Türkmen Milli konserwatoriýasynyň
“Sazşynaslyk” hünäriniň III-nji ýyl talyby.
