Ylmy-usuly maslahat geçirildi

     Garaşsyzlygyň 35 ýyllyk şanly döwründe milli ylym we saz sungaty düýbünden täze, kämil ösüş tapgyryna gadam basdy. Arkadagly Serdarymyzyň parasatly baştutanlygynda pederlerimizden galan medeni mirasymyzy düýpli ylmy esasda derňemek hem-de ony halkara giňişlikde dabaralandyrmak döwlet syýasatynyň ileri tutulýan ugruna öwrüldi. Şeýle belent maksatlardan ugur alnyp, Türkmenistanyň Ylymlar akademiýasy bilen Maýa Kulyýewa adyndaky Türkmen milli konserwatoriýasynyň aspirantura bölüminiň bilelikde gurnamagynda geçirilen “Garaşsyz, Bitarap Türkmenistanda saz ylmynyň täze gazananlary” atly ylmy-usuly maslahat ýurdumyzyň sazşynaslyk taryhynda möhüm sahypany açdy. Ýaş alymlaryň, aspirantlaryň we dalaşgärleriň gatnaşmagyndaky bu forum, milli mukam şöhratynyň häzirki zaman ylmy barlaglardaky belent sepgitlerini bütin aýdyňlygy bilen görkezdi.
     Maslahatyň dowamynda orta atylan ylmy gözlegleriň çägi özüniň çuňlugy we köptaraplylygy bilen tapawutlandy. Konserwatoriýanyň ylmy-döredijilik işleri boýunça prorektory S. Pürsüýew halk saz gurallary orkestriniň kemala geliş taryhynyň esaslaryny şöhlelendirdi, Sazyň taryhy kafedrasynyň müdiri, uly mugallym, sungaty öwreniş ylymlarynyň kandidaty B. Ýakubowa görnükli türkmen şahyry Mämmetweli Keminäniň söz baýlygynyň bagşylaryň repertuaryndaky pelsepewi ornuna ünsi çekdi, Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň aspiranty M. Ýapunowa bolsa akyldar şahyr Magtymguly Pyragynyň dilewarlyk ussatlygy baradaky tema bilen çykyş etdi. Şeýle hem Sazyň taryhy kafedrasynyň uly mugallymy G. Ataýewanyň türkmen kino sazlarynyň ewolýusiýasy, Türkmen döwlet bedenterbiýe we sport institutynyň uly mugallymy J. Geldibaýewanyň sport dikeldiş döwründe professional sazyň täsiri, Saz etnografiýa laboratoriýasynyň uly ylmy işgäri A. Mämmetgulyýewiň Garaşsyzlyk ýyllaryndaky bagşyçylyk mekdebiniň ösüş hakykaty, Magtymguly adyndaky Dil, edebiýat we milli golýazmalar institutynyň aspiranty K. Nazarowanyň halk ertekileriniň poetikasy, Sazyň taryhy kafedrasynyň uly mugallymy R. Muhammedowyň “Gulbaba bagşy” hakyndaky barlaglary hem-de Ýörite fortepiano kafedrasynyň uly mugallymy E. Nuryýewanyň fortepiano biliminiň ilkinji ädimleriniň esaslary baradaky ylmy garaýyşlary bir bitewi ulgamda jemlendi.
     Bu ylmy forumyň netijeleri geçmişiň gymmatlyklaryny öwrenmek bilen bir hatarda, döwrebap medeni ösüşiň ugurlaryny kesgitleýän esasy gollanma boldy. Maslahatyň dowamynda gazanylan ylmy netijeler ýokary okuw mekdeplerinde we ylmy-barlag edaralarynda täze okuw gollanmalaryny taýýarlamakda giňden peýdalanylar. Saz ylmynyň we ylym-bilim ulgamynyň Arkadagly Serdarymyzyň saýlap beren röwşen ýoly bilen ynamly öňe gitmegi, türkmen halkynyň ruhy hazynasyny täze eýýamda has-da baýlaşdyrýar.