Oba hojalyk uniwersitetinde ýaşlaryň innowasion agrostartap bäsleşigi geçirildi

S.A.Nyýazow adyndaky Türkmen oba hojalyk uniwersitetiniň guramagynda Hasyl toýy mynasybetli ýurdumyzyň ýokary okuw mekdepleriniň ýaş alymlarynyň we talyplarynyň arasynda «Ylymly ýaşlar döwletimiziň geljegidir» atly ylmy-taslama sergi bäsleşigi geçirildi. Oba hojalygy we daşky gurşawy goramak ugurlaryna bagyşlanan bu çäre ýaşlaryň innowasion başlangyçlaryny ýüze çykarmak hem-de olaryň hünär derejesini ýokarlandyrmak maksady bilen guraldy. Bu barada ýokary okuw jaýynyň resmi saýtynda habar berildi.

Dabara gatnaşyjylaryň nygtamagynda, Türkmenistanda ýaşlar baradaky döwlet syýasatyny öňe sürmek hem-de ylym-bilim ulgamyny ösdürmek boýunça kabul edilen uzak möhletleýin strategiýalara laýyklykda ýaş nesliň ylmy gözleglerine uly goldaw berilýär. Aşgabatda geçirilen bu bäsleşik hem talyplaryň amaly gözleglerini önümçilik bilen baglanyşdyrmaga hem-de döwrebap tehnologiýalary wagyz etmäge şert döretdi.

Uniwersitetiň Ýaş alymlar geňeşiniň guramaçylygynda iki tapgyrda geçirilen bäsleşige oba hojalygy, daşky gurşaw, azyk we dokma senagaty boýunça onlarça taslama hem-de agrostartap hödürlenildi. Olaryň hatarynda biotehnologiýa usuly arkaly galaktomannan öndürmek, galyndysyz biologik geliotoplumlary döretmek, maldarlykda innowasion tehnologiýalary ornaşdyrmak, robototehnika, sanlylaşdyrmak hem-de ekologik taýdan arassa önümçilik çözgütleri bar.

Bäsleşigiň jemleýji tapgyryna saýlanan innowasion taslamalar oba hojalyk pudagyny ylym we ýokary tehnologiýalar esasynda ösdürmäge uly goşant goşar. Çärä gatnaşyjy ýaş alymlar hem-de talyplar ýurtda ylym bilen meşgullanmak we döredijilik mümkinçiliklerini amala aşyrmak üçin döredilýän giň şertler üçin çuňňur minnetdarlyklaryny bildirdiler.