Aşgabatda halkara gatnaşyklary boýunça zehinli ýaşlaryň bäsleşigi öz işine başlady

Türkmenistanyň Daşary işler ministrliginiň Halkara gatnaşyklary institutynda 11-nji maýda “Halkara gatnaşyklary: parahatçylyk dialogynyň medeniýeti” atly III halkara bäsleşigiň açylyş dabarasy boldy. Bu çäre ýurdumyzyň halkara derejeli forumlaryň we ylmy maslahatlaryň geçirilýän merkezine öwrülendigini ýene-de bir gezek tassyklady. Bäsleşigiň çäklerinde institutyň merkezi binasynda Türkmenistanyň daşary syýasatyna we amaly-haşam sungatyna degişli sergi ýaýbaňlandyryldy. Bu barada «Türkmenistan: Altyn asyr» elektron gazeti habar berdi.

Halkara bäsleşige dünýäniň 9 ýurdundan, şol sanda Russiýadan, Hytaýdan, Beýik Britaniýadan we goňşy Merkezi Aziýa döwletlerinden 40-dan gowrak wekil gatnaşýar. Şeýle hem ýurdumyzyň ýokary okuw mekdeplerinden saýlanan 117 sany zehinli talyp bu abraýly bäsleşikde öz bilimlerini synamaga mümkinçilik aldy. Gatnaşyjylar halkara meseleleriň syýasy-diplomatik ýollar arkaly çözülmeginiň hem-de parahatçylyk medeniýetiniň durnukly ösüşdäki ähmiýetini nygtadylar.

Döwletimiziň alyp barýan Bitaraplyk syýasaty ählumumy abadançylygy üpjün etmäge gönükdirilendir. Bäsleşigiň barşynda bellenilişi ýaly, Türkmenistan Birleşen Milletler Guramasynyň çäklerinde parahatçylygy, energetika we ekologiýa howpsuzlygyny berkitmek boýunça möhüm başlangyçlary öňe sürýär. Bu halkara çäre hem ýaş diplomatlaryň we hünärmenleriň arasynda tejribe alyşmak hem-de dostlukly gatnaşyklary pugtalandyrmak üçin amatly meýdança boldy.

Bäsleşigiň medeni maksatnamasynyň çäklerinde myhmanlar Türkmenistanyň Döwlet medeniýet merkeziniň Döwlet muzeýine baryp gördüler. Muzeýde görkezilýän taryhy gymmatlyklar we halkymyzyň baý medeni mirasy daşary ýurtly gatnaşyjylarda uly täsir galdyrdy. Myhmanlar bäsleşigiň ýokary derejede guralandygy we gyzykly gezelençler üçin guramaçylara öz minnetdarlyklaryny bildirdiler.