Durmuşymyň täze sahypasy
Ýurdumyzda hormatly Prezidentimiziň başlangyçlary bilen milli medeniýetimiziň, aýdym-saz sungatymyzyň ösüşleri barha ilerleýär. Beýleki talyp deň-duşlarym bilen birlikde Maýa Kulyýewa adyndaky Türkmen milli konserwatoriýasynyň talyby bolmak bagtyna eýe bolandygyma begenjimiň çägi ýok. Fortepianoda saz çalmak bilen çagalygymdan imrinip başladym. Şol sebäpden-de, Maýa Kulyýewa adyndaky Türkmen milli konserwatoriýasynyň ýanyndaky Ýörite sazçylyk mekdep internatynda okaýan döwürlerim mekdepde geçirilýan aýdym-saz bäsleşiklerine, çärelere yzygiderli gatnaşmagym, halypalaryň çalan sazlaryny höwes bilen diňlemegim bu ugurdaky ukyp-başarnygymy artdyrmaga uly ýardam berdi. 2022-nji ýylda Russiýa Federasiýasynyň Tatarystan Respublikasynyň Kazan şäherinde geçirilen “Maestoso” atly halkara bäsleşikde II derejeli Diploma mynasyp bolmagym aýdym-saz älemine has içgin aralaşmaga, bu hünäri ykbalyma öwürmäge itergi berdi. Geljekde gowy okap, ussat halypalaryň döredijilik ýoluny mynasyp dowam etdirjekdigime söz berýärin. Gahryman Arkadagymyza, Arkadagly Gahryman Serdarymyza bagtly talyp kalbymdan sagbolsun aýdýaryn. Goý, Gahryman Arkadagymyzyň, hormatly Prezidentimiziň janlary sag, belent başlary aman bolsun!
Aýsona BABAÝEWA, Maýa Kulyýewa adyndaky
Türkmen milli konserwatoriýasynyň 1-nji ýyl talyby.
