ÝYLYŇ TALYBY — 2022
Türkmenistanyň Bilim ministrliginiň hem-de Türkmenistanyň Kärdeşler arkalaşyklarynyň Milli merkeziniň bilelikde guramagyndaTürkmenistanyň ýokary okuw mekdepleriniň talyplarynyň arasynda maý aýynyň 23-den 25-i aralygynda «Ýylyň talyby» atly döwlet bilim bäsleşigi geçirildi. Bu bäsleşigiň maksady Ata Watanymyza çyn ýürekden wepaly hyzmat etjek, ruhubelent, gözýetimi giň, kämil bilimli, anyk maksatly, häzirki zamanyň ösen tehnologiýalaryndan baş çykarýan, zehinli talyplary ýüze çykarmak hem-de olary höweslendirmek bolup durýar.
Bäsleşigiň birinji tapgyry 23-nji maýda S.A.Nyýazow adyndaky Türkmen oba hojalyk uniwersitetinde geçirildi. Onda ýurdumyzyň ýokary okuw mekdepleriniň talyplarynyň 25-si öz ylmy açyşlary, halkara we ýerli gazet-žurnallardaky makalalary, medeni-jemgyýetçilik işlerine, sport çärelerine gatnaşyşlary boýunça bahalandyrylyp, erkin görnüşdäki çykyşlary ýerine ýetirdiler.
Bäsleşik 24-nji maýda Türkmenistanyň Telekomunikasiýalar we informatika institutynda dowam edip, onda talyplar ýurdumyzyň jemgyýetçilik durmuşyny öwreniş sapagy we kompýuterde test barlagy boýunça öz bilimlerini görkezdiler.
25-nji maýda D.Azady adyndaky Türkmen milli dünýä dilleri institutynda dowam eden üçünji tapgyrda türkmen we iňlis dilleri boýunça test barlaglary geçirilip, bäsleşigiň netijeleri yglan edildi. Bäsleşigiň Baş baýragyna Türkmenistanyň S.A.Nyýazow adyndaky Türkmen oba hojalyk uniwersitetiniň talyby Kadyr Amanow mynasyp boldy. Bu bäsleşikde Maýa Kulyýewa adyndaky Türkmen milli konserwatoriýasynyň talyby Gülzada Guldurdyýewa üçünji orny eýelemegi başardy. Ýeňijilere Türkmenistanyň Bilim ministrliginiň we Türkmenistanyň Kärdeşler arkalaşyklarynyň Milli merkeziniň taýýarlan diplomlary, şeýle hem ýadygärlik sowgatlary gowşuryldy.
Biz hem öz gezegimizde konserwatoriýanyň talyby Gülzada Guldurdyýewany mynasyp bolan baýrakly orny bilen tüýs ýürekden gutlap, oňa mundan beýläk-de üstünlikleriň ýar bolmagyny arzuw edýäris!
